Монда без дә бар әле! / Мы тоже здесь живём!
Монда без дә бар әле! / Мы тоже здесь живём!
Авар-аумас…
11.12.09
«Сөн ярлары челтәр-челтәр…»
* * *
Сөн ярлары челтәр-челтәр…
Карлыгачлар-керәшәләр
Әллә шатлык теләшәләр,
Әллә шатлык өләшәләр…
Керәшәләр талпыналар,
Алар күккә тартылалар:
Ук шикелле атылалар,
Гүя таган атыналар…
Иңемдәге канатларның
Кагынганын сизеп торам…
Алар артыннан очмыйча,
Үзем дә чак түзеп торам!
«Миннән дә булмаган…»
* * *
Миннән дә булмаган,
Миннән дә уңмаган
Кешеләр дә бар, дип,
Үземне юатам…
Миннән дә булганрак,
Миннән дә уңганрак
Кешеләр дә бар, дип,
Үземне оялтам…
«Таркатылды…»
* * *
Таркатылды
барлык тармак, –
Кемнәр салды
безгә кармак?
Булабыздыр
кая бармак? –
Булмый белеп,
булмый аңлап…
Һәммәбездә –
кәкре бармак.
Бармакларда –
алтын балдак.
Яшибез бит
илне талап!
Яшибез бит
илне алдап!
Торабыз бит
барсын аңлап!
Полный кошмар,
полный бардак!
26.10.05
Без идек ул, без идек…