И туган йорт, син дә картаясың,
Гомерләрең бара кыскарып.
Түбә такталарың челтәрләнгән,
Баскычларың бара кыйшаеп.
Тирә-ягың гөл бакчасы иде,
Без үскәндә, әле хәтерлим.
Хуҗа булып бара инде хәзер
Әрсез кычытканнар, ак әрем.
Кичер безне, газиз балаларың
Читтә яшәүләргә күнеккән.
Тик барыбер сиңа кайта күңел,
Кендегебез сиңа береккән.
Балачаклар искә төшкән чакта,
Кем сагынмый туган оясын.
И туган йорт, яшьлегендә бергә
Әткәм-әнкәм үргән оя син.
ИСӘНМЕ, ҖИРЕМ!
Исәнме, илем!
Исәнме, җирем!
Мине үстергән
Нигезем-өем!
Саумы, кадерле,
Газиз әнкәем!
Уемда һәрчак
Син – бәгырькәем.
Саумы, туганнар,
Шаулы урманнар!
Нәни чагымнан
Таныш урамнар.
Ашкынды җаным
Сезне күрергә.
Сөю һәм сагыш
Тартты бирегә.
Тартты бирегә
Чишмә сулары.
Туган ягымның
Ташлы юллары.
Кадерле алар
Җанга барысы да.
Онытмам мәңге,
Кая барсам да.
Туган илкәем –
Шигърият иле.
Туган җиркәем –
Шагыйрьләр җире.
Шулай дип җырлый
Талда сандугач.
Тургайлар сайрый,
Кырда көн тугач.
Чишмәләр җырлый,
Мактап халкымны.
Сулары – шифа,
Баса ялкынны.
Авылда туган
Бөек шагыйрьләр.
Ә шагыйрьләрдән –
Саллы шигырьләр.
Әнгам Атнабай,
Каһим абыйлар
Сүздән җыр үрде,
Сирәк андыйлар.
Алар кабызган
Шигырь учагы
Һәркемнең бүген
Җылыта җанын.
Ян, шигъри учак,
Җанга дәрт өстәп.
Гөрләп үтсеннәр
Бәйрәмдәй кичләр.
Саумы, илем, дип,
Саумы, җирем, дип,
Оя корырга
Кайтсыннар кошлар.
Саумы, илем, дип,
Саумы, җирем, дип,
Туган йортларга
Кайтсыннар дуслар.
ТӨШТЕМ ЧИШМӘ БУЕНА
